Apple-ը գործարկում է ID-ի ստուգման երկաստիճան համակարգը

Ամերիկյան Apple տեխնոլոգիական ընկերությունը ներդնում է Apple ID-ի երկաստիճան վավերացման գործառույթը, որը նպատակ ունի բարձրացնել օգտահաշիվների տվյալների անվտանգության մակարդակը տարատեսակ սարքավորումներից օգտվելու ընթացքում, հաղորդում է Cnet-ը: Օգտահաշվի երկաստիճան հաստատման առաջին փուլը, որից կարելի է օգտվել ցանկության դեպքում, հիմնական գաղտնաբառի մուտքագրումն է: Այս գործողությունից հետո օգտատերն իր սմարթֆոնի վրա կստանա քառանիշ թվային կոդ, որի շնորհիվ կհաստատի հիմնական գաղտնաբառը: Apple-ից բացի` համանման համակարգ են օգտագործում նաև Google, Facebook, Yahoo, PayPal, Dropbox և այլ ընկերությունները: Այս համակարգի կիրառմամբ Apple-ը ստեղծում է անվտանգության հավելյալ շերտ, որը հաքերային հարձակումների ժամանակ կպաշտպանի օգտատերերի անձնական էջերը: Նշենք, որ այս գործառույթը չի կարողանա ապահովել նշված անվտանգությունն այն դեպքում, երբ հաքերը տվյալ օգտատիրոջ բջջային սարքավորման անմիջական մատչում ունենա: Հիշեցնենք, որ Apple ID-ն օգտագործվում է iTunes Store բջջային ծրագրերի օնլայն խանութից գնումներ կատարելու և iCloud ամպային ծառայությունում աշխատելու համար: