YouTube-ի բաժանորդագրությունը հնարավոր է` վճարովի դառնա առաջիկա ամիսներին

YouTube տեսահարթակում բաժանորդագրությունը հնարավոր է` վճարովի դառնա, հաղորդում է Cnet-ը: Այս մասին տեղեկություններն այսօր` մարտի 22-ին, Լոս Անջելեսում լրագրողների հետ զրույցում հաստատել է Google տեխնոլոգիական ընկերության փոխնախագահ Ռոբերտ Կինցլը, որը համակարգում է YouTube-ի աշխատանքները: Նրա խոսքով` վճարովի բաժանորդագրության համակարգը չափազանց կարևոր է և ծրագրային մշակման մասնագետների ու կոնտենտի հեղինակներին լրացուցիչ եկամուտներ կարող է ապահովել: Ընկերության տեղեկացված աղբյուրները չեն բացառում, որ վճարովի բաժանորդագրության համակարգը կներդրվի 2013թ. 2-րդ եռամսյակում: Ամսական բաժանորդավճարը կկազմի $1-5: Հիշեցնենք, որ YouTube-ը 2006թ. աշնանը $1,65 մլրդ-ով վաճառվել էր Google ընկերությանը` հեղինակային իրավունքների խախտման մեղադրանքի պատճառով: YouTube-ի ամսական լսարանը գերազանցել է 1 մլրդ-ը: Այլ կերպ ասած` երաժշտական այս ծառայությունից օգտվում է երկրագնդի բնակչության 14,7%-ը, եթե հաշվի առնենք, որ աշխարհի բնակչությունը 6,97 մլրդ մարդ է (ըստ Wolfram Alpha վիճակագրական ընկերության տվյալների):