Ֆեյսբուքյան Like-ը կանմահացվի Լիտվայում

Լիտվայում կտեղադրվի հսկայական արձան ֆեյսբուքյան Like-ին: Այս խորհրդանիշը կոչված է ավելի շատ զբոսաշրջիկներ գրավել Լիտվա: Զբոսաշրջության վարչությունից տեղեկացրել են, որ վեր բարձրացրած բութ մատով հսկայական ձեռքը դեռ պարզապես նախագիծ է: Գործակալությունը մտադիր է լավագույն ուրվանկարի մրցույթ հայտարարել և սկսել գաղափարի իրականացումը: Լավագույն Like-ի համար կքվեարկեն հենց Ֆեյսբուքի և մի քանի այլ սոցցանցերի օգտատերերը, որոնց կխնդրեն ընտրել ամենագրավիչ նախագիծն ու արձանի տեղադրման վայրը: Զուգահեռաբար քվեարկության մասնակիցները տեղեկատվություն կստանան Լիտվայի մասին, ինչն էլ նրանց կարող է դրդել այցելել այդ երկիր: Հսկայական Like-ը «հյուրընկալելու» պատրաստակամություն են հայտնել Վիլնյուս, Կաունաս, Պալանգա և Դրուսկինինկայ քաղաքները: Վերջինն առաջարկվում է «հավանել»-ի խորհրդանիշը տեղադրել լճի մեջտեղում: Քվեարկությունը կտևի մեկ տարի: Յուրաքանչյուր քվեարկողի կուղարկվի «Like քանդակի համասեփականատիրոջ վկայական»: Like-ի ընտրությունը Լիտվայում կկազմակերպվի երեք լեզվով՝ անգլերեն, ռուսերեն և լիտվերեն: Լիտվայի իշխանությունները Facebook-ից դեռ չեն ստացել խորհրդանիշն օգտագործելու թույլտվություն: Զբոսաշրջության վարչությունում ասում են, որ վեր բարձրացրած մատի խորհրդանիշը ծանոթ է դեռ Հին Հռոմից, այնպես որ դրա օգտագործումը գրագողություն չէ: