Intel-ը տարեվերջին 600-դոլարանոց ուլտրաբուքներ կթողարկի

Ամերիկյան Intel տեխնոլոգիական ընկերությունը հայտնում է, որ համեմատաբար մատչելի ուլտրաբուքները վաճառքի կհանվեն ամանօրյա տոների նախօրեին, հաղորդում է Slashgear-ը: Հաջորդ սերնդի ուլտրաբուքերը կաշխատեն Haswell ապարատային հարթակով, Tri-Gate մեթոդիկայով և 22 Նմ տեխնոլոգիայով արտադրվող 4-րդ սերնդի Core պրոցեսորով: Haswell-ի մշակման ընթացքում մասնագետները մեծ ուշադրություն են դարձրել էներգաօգտագործման նվազեցմանը: Intel-ի հաճախորդներին սպասարկման ստորաբաժանման գլխավոր մենեջեր Քիրք Սքաուգենի խոսքով` այդ ուլտրաբուքներն օգտագործողներին կառաջարկվեն նոր հնարավորություններ` տարատեսակ սենսորներ, աքսելերոմետր, որը հնարավորություն կտա խաղերում և բջջային մուլտիմեդիա ծրագրերում հավելյալ գործառույթներ իրականացնել: Haswell պրոցեսորների ցածր էներգաօգտագործման շնորհիվ ուլտրաբուքներն առանց լիցքավորման հնարավոր կլինի օգտագործել առնվազն 8 ժամ: Ակնկալվում է, որ ուլտրաբուքների արժեքը կսկսի $600-ից: