Facebook-ն ԱՄՆ-ում նոր մասնաշենք է կառուցում

Facebook սոցցանցի օգտատերերի թիվը շարունակում է աճել, ուստի աշխատակիցների թիվն ավելացնելու և աշխատանքային տարածությունն ընդլայնելու անհրաժեշտություն է առաջանում: Այդ նպատակով Facebook-ն իր հիմնական շենքից ոչ շատ հեռու` Մենլո Պարկի տարածքում նոր մասնաշենքի շինարարության թույլտվություն է ստացել: Mercury News-ը նշում է, որ նոր մասնաշենքը կտեղակայվի Bayfront Expressway-ի ամբողջ տարածքում, որտեղ կկառուցվի 433 555 քառ. ֆուտ մակերեսով շենքը, որի տանիքում այգի կկառուցվի: Facebook-ի ֆինանսական վերջին հաշվետվության տվյալների համաձայն` ընկերությունը տնօրինում է շուրջ $10 մլրդ գումարային միջոցներ և կարճաժամկետ ֆինանսական ներդրումներ: Հատկանշական է, որ ընկերությունն այլ տարածաշրջաններում ևս զբաղված է նոր գրասենյակների կառուցմամբ: Վերջերս հայտնի դարձավ, որ Facebook-ը Կանադայի Վանկուվեր քաղաքում մտադիր է աշխատանքի ընդունել շուրջ 150 ծրագրային մշակման մասնագետների: Գրասենյակի ընտրությունը պայմանավորված էր նրանով, որ քաղաքը մոտ է Facebook-ի` Սիեթլում տեղակայված ինժեներական գլխավոր մասնաշենքին: