Sony-ն գրանցվել է Գինեսի ռեկորդների գրքում

Էլեկտրատեխնիկա արտադրող ճապոնական Sony ընկերությունն իր Xperia ZL սմարթֆոնի շնորհիվ գրանցվել է Գինեսի ռեկորդների գրքում: Ինչպես հաղորդում է Engadget-ը, 196 Xperia ZL սմարթֆոններով ձևավորվել է միասնական մեծ էկրան, որը ցուցադրվել է փետրվարի 25-28-ը Բարսելոնայում անցկացված Mobile World Congress (MWC 2013) ցուցահանդեսի շրջանակում: Գրանցված նոր ռեկորդը բնութագրվում է որպես աշխարհում բջջային հեռախոսների ամենամեծ խճանկար, որի բարձրությունը 1,9 մ է, իսկ լայնությունը` 1,03 մ: Մակերեսը կազմել է 1,95 քմ: Նշենք, որ Xperia ZL սմարթֆոնի ընտրությունը պատահական չէ. նրա էկրանը զբաղեցնում է հեռախոսի դիմային հարթակի 76%-ը, ինչն ամենաբարձր ցուցանիշն է: Հիշեցնենք, որ Sony Xperia ZL-ն ունի 5-դյույմանոց BRAVIA Mobile Engine 2  էկրան, 1,5  ԳՀց հաճախականությամբ քառամիջուկ Snapdragon S4 Pro պրոցեսոր, Adreno 320 տեսաքարտ, 2 Գբ օպերացիոն և 16 Գբ ներկառուցվող հիշողություններ, 13 Մգպ Exmor RS և դիմային 2 Մգպ տեսախցիկ: Սարքավորումն արժե մոտ $870: