Օբամայի հայտարարությունը «պատմական իրականության խեղաթյուրում» է. Թուրքիայի ԱԳՆ
Civilnet
Թուրքիայի արտգործնախարարությունն «ափսոսանքով է ընդունել» ԱՄՆ նախագահ Բարաք Օբամայի` Հայոց ցեղասպանության 98-րդ տարելիցի կապակցությամբ արած հայտարարությունը: Թուրքիայի արտաքին գերատեսչության պաշտոնական կայքում տեղադրված հայտարարության համաձայն` Օբամայի խոսքը «պատմական իրականության խեղաթյուրում» է: Թուրքիայի ԱԳՆ-ն Սպիտակ տան ղեկավարի հայտարարությունը որակել է որպես հայկական կողմի պնդումները արտացոլող և միակողմանի:
«Թուրքիայի սպասումը դաշնակից ԱՄՆ-ից ոչ թե հարցի ավելի խորացումն է, այլ լուծմանը միտված կառուցողական քայլերի իրականացումը, ինչպես նաև հարցի անկողմանակալ և գիտականորեն ուսումնասիրությունից խուսափող հայկական կողմին ավելի իրատես և հաշտարար լինելու խրախուսումը»,- ասված է Թուրքիայի ԱԳՆ հայտարարության մեջ:
Անկարան կարծում է, որ Օբամայի ելույթը վնաս կհասցնի ինչպես թուրք-ամերիկյան հարաբերություններին, այնպես էլ կբարդացնի հայերի և թուրքերի միջև արդար հիշողության հաստատումը:
Հիշեցնենք, որ Սպիտակ տան ղեկավարն այս տարի ևս խուսափել էր 1915թ. հայերի զանգվածային կոտորածները «ցեղասպանություն» որակելուց և կրկին օգտագործել էր «Մեծ եղեռն» եզրը:
«Ես լիովին հավատարիմ եմ 1915թ. տեղի ունեցածի վերաբերյալ իմ տեսակետին և այն չի փոխվել: Մեր բոլորի շահերից է բխում փաստերի ամբողջական, ազնիվ և արդարացի ընդունումը: Պետություններն առավել հզոր են դառնում անցյալի ցավոտ տարրերն ընդունելու և դրանց հետ հաշվի նստելու միջոցով` այսպիսով հիմք դնելով առավել արդարացի և հանդուրժողական ապագայի համար»,- մասնավորապես ասված էր Օբամայի ուղերձում:
Պատմություններ
