Երուսաղեմի հայոց պատրիարքն Իսրայելին կոչ է արել ճանաչել Հայոց ցեղասպանությունը

Լուսանկարը` jpost.com-ի Երուսաղեմի հայոց պատրիարք Նուրհան Մանուկյանը Հայոց ցեղասպանության 98-րդ տարելիցի կապակցությամբ Երուսաղեմի հրեական համալսարանում (Իսրայել) կազմակերպված համաժողովին ընթերցված ուղերձում նշել է, որ չի կարողանում հասկանալ, թե ինչու է Իսրայելը շարունակում հրաժարվել 1,5 մլն հայերի կոտորածը թուրքերի կողմից Ցեղասպանություն կոչելուց: Ինչպես հաղորդում է Jerusalem Post-ը, համաժողովին մասնակցել են իսրայելցի պաշտոնյաններ, մտավորականներ, Երուսաղեմում Հայաստանի պատվավոր հյուպատոս Ցոլակ Մոմջյանը, Իսրայելում հայ համայնքի ներկայացուցիչներ: Պատրիարքը կարծիք է հայտնել, որ եթե Միացյալ Նահանգներն ընդուներ պատմական ողբերգության փաստը, Իսրայելը նույնը կաներ: «98 տարվա ընթացքում այնքան շատ ջանք է ներդրվել՝ ստիպելու թուրքերին ընդունել իրենց իրագործած ցեղասպանությունը, սակայն նրանք շարունակում են հերքել»,- նշել է Նուրհան Մանուկյանն Իսրայելի հայերին և հրեաներին ուղղված իր ուղերձում: Միաժամանակ` պատրիարքն Իսրայելի իշխանություններին կոչ է արել ճանաչել Հայոց ցեղասպանությունը` հիշեցնելով Նապոլեոն Բոնապարտի հայտնի միտքը, թե աշխարհը տառապում է ոչ թե վատ մարդկանց բռնարարքներից, այլ լավ մարդկանց լռությունից: