Skype-ն ինտեգրվել է Outlook.com-ին

Ամերիկյան Microsoft տեխնոլոգիական ընկերությունը հայտարարել է Outlook.com փոստային ծառայության հնարավորությունների ընդլայնման և նրանում Skype ծառայության ինտեգրման մասին, հաղորդում է Mashable-ը: Ներկայում այս ծառայությունը հասանելի է միայն Մեծ Բրիտանիայի բնակիչներին: Մեկ շաբաթից ծառայությունը հասանելի կլինի նաև Գերմանիայում և ԱՄՆ-ում, իսկ առաջիկա ամիսներին` Outlook.com-ի օգտատերերին ամբողջ աշխարհում: Նշենք, որ Outlook.com-ի համար Skype ծառայությունը գործում է Internet Explorer, Chrome և Firefox բրաուզերների վերջին տարբերակներում` հատուկ պլագինի գործարկման արդյունքում: Հարմարավետության նկատառումներից ելնելով` օգտատիրոջ Skype և Microsoft անձնական էջերը փոխկապակցված են միմյանց, որի արդյունքում կոնտակտային տվյալները միավորվում են մեկ միասնական տեղեկատուի ներսում և սինխրոնիզացվում են բոլոր սարքավորումներում: Հիշեցնենք, որ 2011թ. մայիսին Microsoft-ը ձեռք է բերել Skype ծառայությունը` վերջինիս դիմաց վճարելով $8,5 մլրդ: Skype-ը ստեղծվել է 2003թ.: 2005թ սեպտեմբերին այն գնել է eBay-ը, որը 2009թ. նոյեմբերին այն վաճառել է Silver Lake ներդրումային խմբին: 2012թ. Skype-ի օգտատերերի թիվը գերազանցել է 45 մլն-ը: