Civilnet
Պետք է դրվի ոչ միայն քաղաքապետ Տարոն Մարգարյանի, այլև ամբողջ Հանրապետական կուսակցության ունեցվածքի օրինականության հարցը: Մայիսի 2-ին լրագրողների հետ հանդիպմանը նման հայտարարություն արեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը` նշելով, որ ՀՀԿ-ի ամբողջ ունեցվածքը և գույքը իր սեփականն է` ի տարբերություն մյուս կուսակցությունների, որոնք վարձակալության են վերցրել իրենց միջոցները:
«Ոչ միայն ՀՀԿ անդամներն են հարուստ, այլև կուսակցությունը»,- ասաց Սաքունցը:
Նրա խոսքով` Երևանի ավագանու ընտրությունները զուտ տեղականից վերափոխվել են համապետական նշանակության, քանի որ Երևանը Հայաստանի 1/3-ն է:
Սաքունցի կարծիքով` նախընտրական քարոզարշավում ծրագրային պայքար չեղավ: Նա ընդգծեց, որ ոստիկանությունն իր նախաձեռնությամբ որևէ խախտում չի արձանագրում և սպասում է, որ դիտորդներն ու անդամները դիմեն: Սաքունցը նաև հույս հայտնեց, որ այս ընտրություններում ոստիկանությունը գոնե «ձևական ակտիվություն» կցուցաբերի:
«Եթե ինստրուկտաժի կարիք ունեն, մենք կարող ենք նրանց ասել, թե որոնք են խախտումների հիմնական ձևերը և ոնց կարելի է դրանց դեմ պայքարել»,- ասաց Սաքունցը:
Խոսելով ընտրակաշառքների մասին՝ նա նշեց, որ այս ընտրություններում ընտրակաշառքները շատ նուրբ են կատարվում: Ըստ նրա` խոսքը ոչ միայն գումարների մասին է, այլև, օրինակ, աշխատանքից չհեռացնելու խոստումների:
Սաքունցը նշեց, որ ամենամեծ խնդիրը շարունակում է մնալ ընտրությանը մասնակցածների ցուցակի հրապարակման անհասանելիությունը: «Դե ֆակտո մեռյալների հաշվին ձայների ապահովումը լինելու է ընտրախախտումների մեխանիզմներից մեկը»,- ասաց նա:
Պատմություններ
