Civilnet
Մենք ոչ մեկի առաջ պատասխանատու չենք` բացի ժողովրդից: Մայիսի 2-ին Ազատության հրապարակում «Բարգավաճ Հայաստան» կուսակցության` Երևանի ավագանու ընտրությունների քարոզարշավի ամփոփիչ հանրահավաքին այսպիսի հայտարարություն արեց կուսակցության առաջնորդ Գագիկ Ծառուկյանը:
«Ամենակարևորն այն է, որ հասարակությունը հուսախաբ չի լինելու»,- հայտարարեց ԲՀԿ առաջնորդը` հավելելով, որ իրենք միշտ քիչ ասել են, բայց շատ են արել և այդպես էլ շարունակելու են:
Ծառուկյանը նաև նշեց, որ իրենց քաղաքապետը կաշառք չի վերցնելու, քաղաքացու դիմումին նույն օրը պատասխանելու է և քաղաքացիներին վերևից չի նայելու:
ԲՀԿ առաջնորդի խոսքով` Երևանում չկա չլուծվող խնդիր, բոլոր խնդիրները լուծվող են, սակայն ճիշտ մարդիկ են հարկավոր այդ խնդիրները լուծելու համար:
«Այդ մարդիկ պետք է հասկանան, որ իշխանությունը ոչ թե իրենց հոր սեփականությունն է, այլ ժողովրդի ձայնով հաղթած պաշտոն»,- ասաց նա:
Ծառուկյանը կոչ արեց միասնական լինել, համախմբվել և մոռանալ արտագաղթի ճանապարհը:
«Մայիսի 5-ին Ձեր ձայնը տվեք նրանց, ում հավատում եք և ում հետ հույս եք կապում»,- ասաց ԲՀԿ առաջնորդը` հավելելով, որ այդ ժամանակ ամեն ինչ ճիշտ կլինի:
Պատմություններ
