Civilnet
Նախագահական ընտրություններին չմասնակցելու պատճառով մի փոքր կորուստ էինք ունեցել, պիտի խոստովանեմ, որ մի փոքր հիասթափություն կար ժողովրդի մեջ, բայց այս քարոզարշավի ժամանակ ոչ միայն շատ արագ վերականգնվեց դա, այլև՝ առաջ անցանք. «Երկիր մեդիա» հեռուստատեսության «Երկրի հարցը» հաղորդման շրջանակում նշեց ՀՀ ԱԺ «ԲՀԿ» խմբակցության պատգամավոր, Երևանի ավագանու ընտրություններում «ԲՀԿ» ցուցակը գլխավորող Վարդան Օսկանյանը:
Նրա խոսքով՝ այսօր ավելի ու ավելի ընկալելի է դառնում դեռ քարոզարշավի սկզբում իր շրջանառած այն թեզը, որ մեր երկրի զարգացման գլխավոր խոչընդոտը քաղաքական մենաշնորհն է: «Այնպես որ, նախ անհրաժեշտ է ընտրություններով իշխանափոխության հասնել գոնե քաղաքի մակարդակով, հետո քաղաքական հակակշիռներ ստեղծել»,- նշեց նա՝ հավելելով, որ քաղաքական հակակշիռը կարող է վերաճել տնտեսական հակակշռի: «Մենք, այո, կարող ենք ընդլայնված տնտեսական քաղաքականություն վարել Երևանում»,- ասաց նա:
Վարդան Օսկանյանը խոսեց նաև Երևանի այն բնակիչների մասին, ովքեր ապրում են անկոյուղի բնակարաններում, սոցիալական շատ ծանր պայմաններում, մեկ կիլոմետր անցնելու համար սարսափելի ճանապարհի պարագայում շուրջ քսան րոպե են ծախսում, ովքեր մեծ սպասելիքներ չունեն, այլ միայն՝ տարրական կարիքների բավարարման պահանջ:
Ըստ Օսկանյանի՝ ընտրվելու դեպքում իրենք գործելու են առավելագույնս արդյունավետ մեխանիզմով. «Իհարկե, գեղեցիկ են ծաղիկները, նստարանները, սակայն այդ ամենն այնպես է պետք կազմակերպել, որ ընթացքում աշխատատեղեր ստեղծվեն: Կառավարման փիլիսոփայությունը պիտի փոխվի»,- ասաց նա:
Պատմություններ
