Civilnet
Հայաստանի նորանկախ պատմության մեջ առաջին անգամ ընդդիմադիր ուժերի հարվածը նույն ուղղությամբ է և վճռական: Մայիսի 3-ին լրագրողների հետ հանդիպմանը նման տեսակետ հայտնեց Երևանի ավագանու ընտրություններում «Հայ ազգային կոնգրես» կուսակցության ցուցակը գլխավորող, Երևանի նախկին քաղաքապետ Վահագն Խաչատրյանը՝ ամփոփելով ընտրարշավը:
«Եթե հասնենք հաջողության, ապա իշխանական համակարգի հեռանալու հարցը ավելի իրականանալի կդառնա»,- ասաց Խաչատրյանը՝ հավելելով, որ առաջին անգամ է նաև, որ ոչ իշխանական ուժերն ավելի շատ քաղաքական հանգամանքներին են ուշադրություն դարձնում:
Խոսելով ավագանու ընտրությունների մյուս առանձնահատկությունների մասին՝ նախկին քաղաքապետը նշեց, որ այս անգամ ընտրություններին մասնակցում են Ազգային ժողովում ներկայացված բոլոր կուսակցությունները և բոլորն էլ, գրեթե, առաջին դեմքերով են հանդես գալիս:
Հարցին, թե արդյոք ՀԱԿ-ը մրցակցում, թե համագործակցում է ոչ իշխանական ուժերի հետ, Խաչատրյանը նշեց, որ երկուսն էլ, ինչը նշանակում է, որ ուժերն ազատ են:
«Լավ է, որ ոչ իշխանական ուժերով միասնական ցուցակով հանդես չեկանք, քանի որ այս ձևով հասարակությունն ավելի մեծ ընտրության հնարավորություն ունի»,- ասաց նա` հավելելով, որ ընդդիմադիր բոլոր հինգ թեկնածուներն էլ կարող են քաղաքապետ դառնալ:
Խաչատրյանը նշեց, որ ընտրողների մոտ մեծ ոգևորություն է զգում, և կարևոր է այն փաստը, որ քաղաքացին հասկացավ, որ այս ընտրությունները քաղաքական են:
Խոսելով 2009թ. ավագանու ընտրություններում ՀԱԿ-ի ստացած մանդատները վայր դնելու մասին՝ թեկնածուն նշեց, որ իրենք կամակորություն չեն դրսևորել, և բոլորն էլ գիտեն, որ ընտրությունները եղել են կեղծված: Նրա խոսքով` եթե իրենց պատրաստած փաստաթուղթը հասներ Սահմանադրական դատարան, ապա ընտրությունները չեղյալ կհայտարարվեին: Սակայն այն այդպես էլ չհասավ, քանի որ ՀԱԿ անդամ Մարքսիստական կուսակցությունը չստորագրեց այդ փաստաթղթի տակ:
Խոսելով քաղաքապետ ընտրվելու դեպքում իր առաջին գործողությունների մասին՝ ՀԱԿ ներկայացուցիչը նշեց, որ իր համար ամենակարևորը քաղաքացին է և այն, թե նա ինչ կպատվիրի իրեն: Խաչատրյանը նաև ընդգծեց, որ ուշադրություն է դարձնելու տարբեր սոցհարցումներին, թե ինչի կարիք ունի երևանցին:
Պատմություններ
