Civilnet
Երևանի ավագանու՝ երեկ տեղի ունեցած ընտրությունների քվեների վերահաշվարկի դիմումներ ներկայացվել են թվով 159 տեղամասեր (դա բոլոր տեղամասերի շուրջ 34%-ն է). նշեց ՀՀ կենտրոնական ընտրական հանձնաժողովի նախագահ Տիգրան Մուկուչյանը «Արմնյուզ» հեռուստատեսության «Բանաձև» հաղորդման շրջանակում: Նրա խոսքով՝ դիմումների մեծ մասը ներկայացրել է «Բարև Երևան» դաշինքը: «Դիմումները պատշաճ ձևով ձևակերպված են, ժամկետում, դրանք պատշաճ կարգով քննվելու են,- ասաց Մուկուչյանը:-Կան ընտրատեղամասային ընտրական հանձնաժողովներ, որտեղ ներկայացված վերահաշվարկի դիմումները քիչ են՝ օրինակ 3 դիմում, 5 դիմում, կան ընտրական հանձնաժողովներ, որտեղ 30 տեղամասի վերաբերյալ ներկայացվել են վերահաշվարկի դիմումներ»:
Վերահաշվարկի 159 դիմումների մեջ, ըստ Մուկուչյանի, կան «բավականին հետաքրքիր դիմումներ»: «Օրինակ, հանդիպում են դիմումներ, որտեղ հանձնաժողովի նախագահը դիմում է իր ղեկավարած տեղամասի քվեների վերահաշվարկը կազմակերպելու համար. մինչդեռ ինքը պիտի որ ղեկավարեր այդ ամբողջ գործընթացը և քաջատեղյակ լիներ բոլոր մանրամասներին»,- նշեց նա:
Նրա խոսքով՝ ընտրախախտումներն ընդգրկել են ընտրատեղամասերի ոչ ավելի, քան տաս տոկոսը: «Բայց այդ տաս տոկոսի մասին շատ-շատ է խոսում, իսկ այն իննսուն տոկոսի մասին ընդհանրապես չի խոսվում: Ավելին, երբ այցելում էինք տեղամասեր ու զրուցում դիտորդների հետ, նրանցից շատերը մի կերպ, դժվարությամբ էին ասում, որ ոչ մի խախտում չեն նկատել: Մեզանում ավելի հեշտ են խոսում խախտումների մասին ու բոլորովին չեն ուզում գնահատել այն, որ խախտումները նվազել են»,- նշեց նա:
Մուկուչյանը հիշեցրեց, որ արդյունքները պաշտոնապես կամփոփվեն մեկ շաբաթից: «Ընտրական օրենսգիրքն ամրագում է, որ վերահաշվարկը պիտի սկսվի վաղը ժամը 9-ից ու տևի շուրջ 3.5 օր: Օրենսգիրքը նախատեսում է, որ եթե դիմումների քանակը մեծ է, ապա հանձնաժողովը կարող է որոշում կայացնել և աշխատել 2 խմբով»,- ասաց նա:
Անդրադառնալով կորած քվեաթերթիկների խնդրին՝ Մուկուչյանը նշեց, որ դա կարող է լինել տպագրական խոտանի խնդիր, սակայն, նրա խոսքով, այդ խնդրի մասին ՀԱԿ-ի ներկայացրած դիմումը ևս քննության փուլում է:
Պատմություններ
