WP 8-ն օգնել է Microsoft-ին կրկնապատկել բեռնվող բջջային ծրագրերի թիվը

Ամերիկյան Microsoft տեխնոլոգիական ընկերությունը հայտարարել է, որ Windows Phone 8 (WP 8) հարթակի թողարկման պահից ի վեր Marketplace օնլայն խանութից բեռնվող բջջային ծրագրերի թիվը կրկնապատկվել է, իսկ վճարովի բջջային ծրագրերի վաճառքից ստացված եկամուտներն ավելացել են 140%-ով, հաղորդում է Mashable-ը: Microsoft-ում նշում են, որ վերլուծաբանները ևս այս ցուցանիշի աճի գործում կարևորում են WP 8-ի դերը: Kantar Worldpanel ComTech հետազոտական ընկերության տվյալների համաձայն` 2013թ. 1-ին եռամսյակում նոր հարթակը զբաղեցրել է սմարթֆոնների շուկայի 5,6%-ը, ինչը 1,9%-ով գերազանցում է 2012թ. նույն ժամանակահատվածի ցուցանիշը: Ընկերությունում հավելում են, թե Nokia Lumia 720 և 520/521 սմարթֆոնները նոր են համաշխարհային շուկա դուրս եկել և դեռ բազմաթիվ օգտագործողներ իրենց նախապատվությունը կտան  WP 8-ին: Ի դեպ` Microsoft-ը վերջերս հայտարարել է 15 նոր բջջային օպերատորների հետ սակագնային պլանում համագործակցության մասին, որը մեկնարկել է 2012թ. օգոստոսից: