Civilnet
ԲՀԿ մամուլի խոսնակ Տիգրան Ուրիխանյանը, պատասխանելով «Հրապարակ» օրաթերթի տեղեկատվությանը, թե մայիսի 5-ին Երևանի ավագանու «Բարգավաճ Հայաստան» կուսակացության ցուցակը գլխավորող Վարդան Օսկանյանը չի մասնակցել ընտրությանը, նշել է.
«Նշյալ օրաթերթի հրապարակած տեղեկատվությունը չի համապատասխանում իրականությանը: Վարդան Օսկանյանը քվեարկել է Գրողների միությունում տեղակայված ընտրատեղամասում՝ ժամը 12-ին, և այդ մասին նախապես տեղեկացվել է լրատվամիջոցներին:
Ավելին, քվեարկելուց անմիջապես հետո, Գրողների միության բակում, ԲՀԿ համամասնական ցուցակի առաջին համարը պատասխանել է մոտ երեք տասնյակ լրատվամիջոցի հարցերին:
Կարծում եմ, լրագրողական պրոֆեսիոնալիզմն ու միմիայն փաստերին ապավինումը ցանկացած լրատվամիջոցի համար պիտի լինի գերակա: Միևնույն ժամանակ ցավում եմ, որ տվյալ լրատվամիջոցի կոնկրետ աշխատակիցը՝ խորը և հիվանդագին մտասևեռում ունենալով ԲՀԿ-ի հանդեպ, չի կարողանում պահպանել լրագրողական անգամ ամենատարրական էթիկայի կանոնները և ինքն իրեն հետևողականորեն դնում է ամենաանհեթեթ վիճակների մեջ»:
Հիշեցնենք՝ «Հրապարակ» օրաթերթն իր այսօրվա համարում գրել էր, որ հայաստանյան երկրորդ քաղաքական ուժը համարվող ԲՀԿ-ի իրական առաջնորդները` երկու առաջին դեմքերը և մոդերացիոն առաջնորդը՝ ԲՀԿ-ի նախագահ Գագիկ Ծառուկյանը, Վարդան Օսկանյանը և Ռոբերտ Քոչարյանը, վերջին երկու ընտրություններին չեն մասնակցել:
Պատմություններ
