Google-ը կմիավորի իր ամպային ծառայությունները մեկ համակարգում

Ամերիկյան Google տեխնոլոգիական ընկերությունը Սան Ֆրանցիսկոյում մայիսի 15-17-ը կայանալիք ամենամյա Google I/O համաժողովի շրջանակում կներկայացնի ծրագրային նորույթներ, հաղորդում է Verge-ը: Մասնավորապես` համացանցում տեղեկություններ են հայտնվել այն մասին, որ համաժողովի մի մասը նվիրված է լինելու ամպային տեխնոլոգիաներին: Վերջերս ընկերությունը հաղորդել էր, որ մտադիր է փոփոխությունների ենթարկել տվյալների պահպանման ամպային ծառայության մոտեցումները, ինչի արդյունքում բոլոր ծառայությունները կունենան մեկ միասնական վիրտուալ տարածություն: Մինչ այժմ Google-ն առաջարկում էր տվյալների պահպանման 10 Գբ անվճար տարածություն Gmail էլեկտրոնային հաղորդագրությունների ծառայության և 5 Գբ` Drive-ի և Google+-ի համար: Նոր համակարգի ներդրման արդյունքում օգտատերերը կունենան 15 Գբ տվյալների պահպանման համար նախատեսված մեկ միասնական ամպային տարածություն: Հիշեցնենք, որ վերջերս Google-ը հայտարարել էր Play Games խաղային սոցցանցի ստեղծման մասին, ինչը հնարավորություն կտա տարբեր խաղային բջջային ծրագրերը միավորել մեկ համակարգում: Ակնհայտ է, որ Google-ը որոշել է հնարավորինս հեշտացնել օգտատերերի աշխատանքները տարաբնույթ ծառայությունների հետ, ինչը, ըստ փորձագետների, կնպաստի դրանց հեղինակության աճին: