Nokia-ն ներկայացրել է առաջին ալյումինե Lumia-ն

Բջջային սարքավորումներ արտադրող ֆիննական Nokia ընկերությունը մայիսի 14-ին ներկայացրել է Lumia 925 սմարթֆոնը, որն աշխատում է Windows Phone 8 օպերացիոն համակարգով, հաղորդում է TechCrunch-ը: Lumia 925-ը եկել է փոխարինելու Lumia 920 սմարթֆոնին, որը ներկայացվել է 2012թ. սեպտեմբերին: Նորույթը բջջային հեռախոսների Lumia դասի առաջին ալյումինե սմարթֆոնն է, որի հետնամասը սակայն պատրաստված է պլաստիկայից, ինչպես մյուս Lumia սմարթֆոնների դեպքում է: Lumia 925-ը ներկայացվել է մոխրագույն, սպիտակ և սև գույներով: Նոր Lumia սմարթֆոնն ունի երկմիջուկ Snapdragon S4 Pro պրոցեսոր, 1 Գբ օպերացիոն հիշողություն, 4,5-դյույմանոց AMOLED էկրան, 8,7 Մգպ օպտիկական կայունությամբ տեսախցիկ, որը հնարավորություն է տալիս նկարահանել մթության մեջ` առանց լուսարձակի օգտագործման: Սարքավորումը կշռում է 139 գ և ունի 8,5 մմ հաստություն: Սմարթֆոնի «Տեսախցիկ» բջջային ծրագրում հայտնվել է Smart Camera ռեժիմը, որի օգնությամբ կարելի է Action Shot կամ Motion Focus` շարժման էֆեկտով լուսանկարներ ստանալ: Lumia 925-ի համաշխարհային վաճառքները կմեկնարկեն 2013թ. հունիսին: Եվրոպայում այն կարժենա €469: