Windows Blue-ն պաշտոնապես կվերանվանվի Windows 8.1

ԱՄՆ-ի Բոստոն քաղաքում ներդրողների համար կայացած համաժողովի շրջանակում ամերիկյան Microsoft տեխնոլոգիական ընկերության ֆինանսական նոր տնօրեն Թեմի Ռելերը հայտարարել է, որ Windows Blue օպերացիոն համակարգը պաշտոնապես կվերանվանվի Windows 8.1, հաղորդում է TechCrunch-ը: Windows 8-ի համար նախատեսված թարմացումները կիրականացվեն ընթացիկ տարում: Ընկերությունը դեռ չի հաղորդում նոր օպերացիոն համակարգի թարմացումների և նորամուծությունների մասին, սակայն նշում է, որ օպերացիոն համակարգի նախնական տարբերակը հասանելի կլինի 2013թ. հունիսին: Ռելերը նշել է, որ Windows 8.1-ի նորամուծությունների և լրացումների մեծ մասը հիմնված են Windows 8-ի օգտատերերի արձագանքների վրա: Նրա խոսքով` Windows 8.1-ը հասանելի կլինի որպես Windows 8-ի անվճար թարմացման փաթեթ: Հատկանշական է, որ ոչ պաշտոնական տվյալների համաձայն` Windows Blue համակարգում ավելացել է Start ստեղնը: Նշվում է, որ հնարավոր կլինի հրաժարվել նաև «կենդանի սալիկներով» էկրանի հետ աշխատանքից: