Ներկայացվել է Google+ Photos-ի թարմացված տարբերակը

Ամերիկյան Google տեխնոլոգիական ընկերությունը Սան Ֆրանցիսկոյում մայիսի 15-ին մեկնարկած ամենամյա Google I/O համաժողովի շրջանակում հայտարարել է, որ Google+ Photos ծառայությունում հայտնվել է օգտահաշվում ամբողջական չափերով լուսանկար ներբեռնելու գործառույթը, հաղորդում է Verge-ը: Այս նպատակով օգտատիրոջը տրամադրվում է 15 Գբ անվճար հիշողության հնարավորություն: Մինչև 2048 պիքսել չափերի լուսանկարների ներբեռնման համար տրամադրվում է անսահմանափակ տարածություն: Հիշեցնենք, որ Սան Ֆրանցիսկոյում մայիսի 15-ին մեկնարկած ամենամյա Google I/O համաժողովը 6-րդն է: Այս անգամ համաժողովին հավաքվել է 6 հազ. մասնակից: Կոնֆերանսի առաջին օրը Google-ը չի ներկայացրել ո´չ Android օպերացիոն համակարգի նոր տարբերակը, ո´չ էլ նոր սարքավորումներ: Չի ներկայացվել նաև Google Glass խելացի ակնոցը, որի փոխարեն ընկերությունը համաժողովի մասնակիցներին բաժանել է Chromebook Pixel նոութբուքները, որոնց մանրածախ վաճառքի արժեքը կազմում է $1450: