Microsoft-ի ու Google-ի «տեսապատերազմը» կավարտվի

Ամերիկյան Google և Microsoft տեխնոլոգիական ընկերությունների «տեսապատերազմում» անսպասելի շրջադարձ է տեղի ունեցել. Microsoft-ի ներկայացուցիչները հայտարարել են, որ համաձայն են գովազդ ավելացնել YouTube-ի իրենց բջջային ծրագրում, հաղորդում է Mashable-ը: Microsoft-ում նշում են, որ իրենք «երջանիկ» կլինեն Windows Phone-ի համար նախատեսված YouTube-ի բջջային ծրագրում գովազդ ավելացնել, եթե Google-ն ընկերությանը տրամադրի բջջային ծրագրի ինտերֆեյսի մատչման իրավունքը: Այսինքն Google-ը Microsoft-ին պետք է ավելի շատ հնարավորություններ ընձեռի ծրագրի ճշգրիտ կրկնօրինակի ստեղծման հարցում: Նշենք, որ Youtube բջջային ծրագրի թողարկումից անմիջապես հետո Google-ը Microsoft-ին պաշտոնական նամակ էր հղել, որում պահանջել էր հրաժարվել ոչ միայն այն տարածելուց, այլև ոչնչացնել ծրագրի` գոյություն ունեցող բոլոր կրկնօրինակները: Google-ի գործադիր տնօրեն Լարրի Փեյջը Google I/O ամենամյա համաժողովի շրջանակում խոսել է համագործակցության ամրապնդման անհրաժեշտության մասին: