Պենտագոնին դուր է եկել Apple-ը

ԱՄՆ պաշտպանության նախարարությունը թույլատրել է ամերիկյան Apple տեխնոլոգիական ընկերության սարքավորումների կիրառումը սեփական ցանցերում, հաղորդում է Mashable-ը: Այս քայլը հնարավորություն կտա iPhone և iPad սարքավորումներին մրցակցության մեջ մտնել կանադական Blackberry և հարավորեական Samsung ընկերություննների սարքավորումների հետ: Պենտագոնի գաղտնի տեղեկատվական աշխատանքների կատարմանը կթույլատրվեն կոդավորման մի քանի ստանդարտներ պարունակող iOS 6 օպերացիոն համակարգով աշխատող սարքավորումները: Հիշեցնենք, որ 2013թ. մայիսի 2-ին Պենտագոնը հավանություն էր տվել իր ցանցերում Samsung-ի և Blackberry-ի մի քանի սարքավորումների օգտագործմանը: Խոսքը Samsung-ի թողարկած Android Knox պաշտպանված օպերացիոն համակարգի, BlackBerry 10 օպերացիոն համակարգով աշխատող սմարթֆոնների, ինչպես նաև PlayBook պլանշետների մասին է, որոնք աշխատում են Enterprise Service 10 պաշտպանված օպերացիոն համակարգով: Հարկ է նշել, որ մինչ այժմ Պենտագոնի սմարթֆոնների մատակարարը միայն BlackBerry-ն էր: Ներկայում նախարարության 470 հազ. աշխատակիցներ օգտվում են BlackBerry-ի, 41 հազ-ը` Apple-ի,  8,7 հազ-ը` Android գաջեթներից: