iPhone օգտագործողների գոհունակությունը նվազել է. վիճակագրություն

Ամերիկյան Apple տեխնոլոգիական ընկերության iPhone սմարթֆոնների օգտագործողները անցած տարվա համեմատ ավելի քիչ են բավարարված իրենց գաջեթով: Այս մասին հաղորդում է BusinessInsider-ը` վկայակոչելով Ամերիկացի սպառողների բավարարվածության ինդեքսի (ACSI) հրապարակած վիճակագրությունը: Apple-ն այս տարի կորցրել է սպառողների բավարարվածության 2%-ը, այն դեպքում, երբ էլեկտրատեխնիկա արտադրող հարավկորեական Samsung-ն արձանագրել է այս ցուցանիշի 7-տոկոսանոց աճ: Չնայած Apple-ի վարկանիշի նվազման` iPhone օգտագործողներն ավելի գոհ են իրենց սմարթֆոններից, քան այլ բրենդների սմարթֆոնների օգտագործողները: Սպառողական գոհունակության ցուցանիշի անկում են արձանագրել նաև հարավկորեական LG և թայվանական HTC ընկերությունները, իսկ կանադական BlackBerry-ի ցուցանիշը մնացել է անփոփոխ: Վարկանիշը կազմվել է 70 հազ. ամերիկացիների շրջանում կատարված հարցումների հիման վրա: