Apple-ի նախկին աշխատակիցը կզբաղվի Intel-ի «նոր սարքավորումներով»

Ամերիկյան Intel Corp. տեխնոլոգիական ընկերության նորանշանակ գլխավոր տնօրեն Բրայան Կրզանիչն անմիջապես անցել է ընկերության վերակազմակերպման աշխատանքներին, հաղորդում է Reuters-ը: Անցած շաբաթ նա խոստացել էր ակտիվացնել բջջային սարքավորումների համար նոր լուծումների որոնմանն ուղղված աշխատանքները, իսկ նախօրեին հայտնվել են այս ոլորտում կատարվող առաջին քայլերի մասին լուրերը: Reuters-ի հաղորդմամբ` Intel-ում ստեղծվում է առանձին ստորաբաժանում, որի նպատակն է մրցակիցներից հետ նվաճել բջջային սարքավորումների շուկայում իր մասնաբաժինը: Նոր ստորաբաժանման շնորհիվ տեխնոլոգիայի և բիզնեսի ոլորտում օգտագործելով գերժամանակակից նորարարությունները` Intel-ը կառաջարկի այնպիսի արտադրանք, որն ունակ կլինի ստեղծել նոր շուկաներ և դրանցում դառնալ առաջատար: Հատկանշական է, որ նոր ստորաբաժանումը կգլխավորի ամերիկյան Palm և Apple տեխնոլոգիական ընկերությունների նախկին աշխատակից Մայք Բելը: Վերջին տարիներին նա Intel-ի բջջային պրոցեսորների գծով ղեկավարներից մեկն էր: