Civilnet
2013թ. մայիսին Հայաստանի «Մայքրոսոֆթ» ինովացիոն կենտրոնը նշում է հիմնադրման երկրորդ տարեդարձը: Կենտրոնի տարածած հաղորդագրության համաձայն` երկու տարվա ընթացքում այն հասցրել է ճանաչվել իբրև վայր, որտեղ հանդիպում են նորարար միտքն ու այն իրականություն դարձնելու պատրաստակամություն և կարողություն ունեցող ՏՏ մասնագետներ, ուսանողներ, բիզնեսի, պետական համակարգի, քաղաքացիական հասարակության, դոնոր կազմակերպությունների, վենչուրային հիմնադրամների ներկայացուցիչներ:
«Մայքրոսոֆթ» ինովացիոն կենտրոնի հիմնումը հայկական ՏՏ ոլորտի վերջին շրջանի դինամիկ զարգացման տրամաբանական արդյունքն է: Ոլորտի աճը, սեփական արտադրանքի ավելացումը և դրա ներկայությունը համաշխարհային շուկայում, վերազգային կազմակերպությունների հետաքրքրությունը և ներկայությունը Հայաստանում, երիտասարդների շրջանում ձեռներեցության ձգտումը և նորանոր ձեռնարկությունների հիմնումը հրամայական են դարձնում նմանատիպ միջավայրի գոյությունը:
Իր գործունեության երկու տարվա ընթացքում «Մայքրոսոֆթ» ինովացիոն կենտրոնի կարողությունների զարգացման բաղադրիչի շրջանակում իրականացված տեխնոլոգիական և բիզնես հմտությունների կարճաժամկետ ու երկարաժակետ դասընթացներին և սեմինարներին մասնակցել է ավելի քան 2000 ուսանող ՀՀ տարբեր բուհերից:
Նորարար գաղափարների բացահայտմանն ուղղված շուրջ 10 մրցույթներին մասնակցել են 100-ից ավել թիմեր: Այդ մրցույթների ընթացքում ներկայացված և մշակված լավագույն գաղափարների մեծ մասն այսօր շուկայում են կամ պատրաստ են մուտք գործել հայաստանյան և արտասահմանյան շուկաներ:
«Մայքրոսոֆթ» ինովացիոն կենտրոնի աջակցությունը ստացած թիմերից մի քանիսը գրանցված են իբրև նորաստեղծ ընկերություններ կամ գրանցման փուլում են՝ BigBrain, 4car.am, eagro.am, Apollosoft, Clean H2O, Lionsharp Solutions և այլն:
Կենտրոնը 2012թ. ամռանը սկսել է իրականացնել կարճաժամկետ պրակտիկայի ծրագիր՝ հայաստանյան առաջատար ՏՏ ընկերությունների հետ համատեղ: Ընդամենը մի քանի ամսում տեսական և գործնական հմտությունները խորացնելու և արդյունքում երաշխավորված աշխատատեղով ապահովելու այս մոդելի արդյունքները գերազանցել են բոլոր սպասումները` ապահովելով մասնակիցների 90%-ի զբաղվածություն:
Պատմություններ
