iPhone-ի էկրանը պաշտպանված կլինի մանրէներից և արևից

Առաջատար սմարթֆոնների` iPhone-ի, Galaxy S4-ի և HTC One-ի էկրանները հարվածներից և վնասներից պաշտպանում է ամերիկյան Corning ընկերության Gorilla Glass ապակին: BusinessInsider-ը հաղորդում է, որ վերջերս տեղեկություններ էին տարածվել այն մասին, թե շուտով բջջային սարքավորումների էկրանները կսկսեն պատրաստել շափյուղայից, որն ադամանդից հետո բնական ամենաամուր նյութն է աշխարհում: Փորձագետները, որոնք կանխատեսել էին հումքանյութերի գների անկումը, կարծում էին, որ որոշ արտադրողներ արդեն 2013-ից կսկսեն թողարկել շափյուղային պլանշետներ և սմարթֆոններ: Համանման մտադրություններ ունի Apple-ը, որն արդեն օգտագործում է բարձր դիմացկունությամբ նյութեր` iPhone 5-ի հետնամասի տեսախցիկի պաշտպանության նպատակով: Նման կանխատեսումները Corning-ին ստիպեցին հայտարարել Gorilla Glass-ի մոտալուտ թարմացման մասին: Առաջին հերթին ընկերությունը հայտարարեց, որ iPhone-ի նոր էկրաններին լուսանկարներն ավելի պարզ կարտացոլվեն արևի շողերի ներքո: Մյուս կողմից` նոր ծածկույթը կներառի հակամիկրոբային տեխնոլոգիա, ինչը կկանխի սմարթֆոնի էկրանին մանրէների հնարավոր տարածումը: Նշենք, որ Gorilla Glass ապակիներն արդեն բավականին բարակ և ամուր են այնպիսի ճկուն գաջեթների կազմում կիրառվելու համար, ինչպիսիք են Apple iWatch ժամացույցները: Իսկ այդ էկրանները կոտրելու համար անհրաժեշտ է կիրառել 2,5 անգամ ավելի մեծ ուժ, քան շափյուղային գաջեթների դեպքում: Corning-ը նոր ծածկույթով առաջին էկրանների թողարկման ժամկետների մասին տեղեկություններ դեռ չի հաղորդում: