Google-ը WiFi-ով օդապարիկներ կուղարկի Աֆրիկա

Ամերիկյան Google տեխնոլոգիական ընկերությունը դիտարկում է գյուղական շրջանների բնակիչներին օդապարիկների և ղեկավարվող օդապարիկների օգնությամբ ինտերնետով ապահովելու ծրագրին մասնակցելու հնարավորությունը, հաղորդում է ամերիկյան Wall Street Journal պարբերականը: High-altitude platforms անվանումով թռչող սարքերում նախատեսվում է տեղադրել սարքավորում, որը հնարավորություն կտա կազմակերպել անլար ինտերնետի հասանելիության գործընթացը: High-altitude platforms հարթակը նախատեսվում է կիրառել Աֆրիկայում և Հարավարևելյան Ասիայում: Օդապարիկներից բացի` Google-ը ծրագրում է գյուղական շրջանների բնակիչներին ինտերնետ տրամադրել արբանյակային ալիքների և հեռուստատեսային հաճախականությունների չօգտագործվող հատվածների օգնությամբ: Համեմատության համար նշենք, որ ԱՄՆ-ում գոյություն ունի Google Fiber անվանումով համանման նախագիծ, որն աշխատում է փորձնական ռեժիմով: Որպես բազա ընտրված է Կանզաս քաղաքը, որի տարածքում ապրող 600 հազ. բնակչի համար ստեղծվել է նոր սերնդի օպտիկական ցանց: Ամսական $120-ի դիմաց բաժանորդին տրամադրվում է 1 Գբտ/վրկ արագությամբ անսահմանափակ ինտերնետ, Fiber-TV և Nexus 7 պլանշետ: