Նոր ծառայություն Facebook-ում` Pipe

Facebook սոցցանցը ներկայացրել է Pipe բջջային ծրագրի միջոցով ֆայլերի փոխանակման նոր ծառայությունը, որը հնարավորություն է տալիս սոցցանցի օգտատերերին հաղորդագրությունների միջոցով միմյանց փոխանցել մինչև 1 Գբ ծավալով ֆայլեր, հաղորդում է Verge-ը: Pipe-ի բետա տարբերակի փորձարկումը կմեկնարկի մի քանի օր անց: Նշենք, որ տվյալների փոխանակումն իրականացվում է անմիջապես P2P-ի միջոցով, միևնույն ժամանակ Facebook-ի սերվերները չեն գործարկվում: Նոր ծառայությունից օգտվելը բավական հեշտ է. անհրաժեշտ է միայն տվյալ ֆայլը տեղադրել նշված պատուհանում և օգտատիրոջ ընկերների ցանկից ընտրել անհրաժեշտ կոնտակտը: Բջջային նոր ծրագրի հեղինակ Սիմոն Հոսելի խոսքով` ձեռնարկվել են անհրաժեշտ բոլոր միջոցները, որպեսզի Pipe-ը մատչելի լինի սոցցանցի օգտատերերին: Քանի որ Pipe-ի միջոցով ֆայլերի փոխանցումն իրականացվում է ուղղակիորեն, ուստի անհրաժեշտ է երկու օգտատերերի` օնլայն կարգավիճակում լինելը: Pipe-ի բջջային տարբերակը դեռ չի գործում: Հոսելին նշել է, որ օգտատերերն ի սկզբանե պետք է սովորեն գործածել այն անհատական համակարգիչներում, որից հետո ծրագրային մշակման մասնագետները կաշխատեն բջջային տարբերակի ուղղությամբ: