Apple iBookstore-ում կհայտնվի Beatles-ի նկարներով էլեկտրոնային գիրք

Հունիսի 18-ին Apple iBookstore վիրտուալ խանութում կհայտնվի The Beatles լեգենդար խմբի՝ մինչ այսօր անհայտ լուսանկարներով էլեկտրոնային գիրք: Բոլոր լուսանկարները խմբի թմբկահար Ռինգո Սթարի անձնական հավաքածուից են: «Դրանք նկարներ են, որոնք այլևս ոչ ոք չունի», - ասել է երաժիշտը գրքի թողարկման առթիվ: Լուսանկարների թվում են Փոլ Մակքարթնիի, Ջոն Լենոնի, Ջորջ Հարիսոնի և Ռինգո Սթարի նկարները համերգային հարթակներից և ձայնագրման ստուդիաներից դուրս՝ առօրյա միջավայրում: Սթարը նաև շատ է լուսանկարել իր ընկերներին հյուրախաղերի ժամանակ: Նկարներն ուղեկցվում են հեղինակի տեսամեկնաբանություններով, լիվերպուլյան մանկության և պատանեկության, ինչպես նաև ընկերների մասին նրա հուշերով: Գրքի տպագիր տարբերակը՝ «Լուսանկար» սովորական խորագրով և Սթարի ինքնագրով, կթողարկվի այս տարվա դեկտեմբերին՝ 2,5 հազ. տպաքանակով: