Օգտատերերը դրական են գնահատել iOS 7-ի դիզայնը

Սոցհարցումներ իրականացնող Polar ծառայությունը հարցում է կատարել` պարզելու iOS 7 օպերացիոն համակարգի բջջային տարբերակի դիզայնի վերաբերյալ օգտատերերի վերաբերմունքը, հաղորդում է Mashable-ը: Հարցման արդյունքների համաձայն` օգտատերերը iOS 7-ի դիզայնը գերադասում են iOS 6-ից: Հարցմանը մասնակցել է 289,895 մարդ, որոնց 66%-ը քվեարկել է նոր համակարգի օգտին: Հարցման մասնակիցների շրջանում դժգոհություն են առաջացրել միայն «Հիշեցում», Safari, Game Center, «Տեսախցիկ», «Հաշվիչ» բջջային ծրագրերի ստեղները: Նրանց կողմից առավել հավանության արժանացած ստեղները հետևյալն են.

1. «Ժամացույց»
2. «Հաղորդագրություն»
3. «Հեռախոս»
4. «Կոմպաս»
5. «iTunes»
6. «Եղանակ»
7. «Երաժշտություն»
8. «Տեսանյութեր»
9. «App Store» 10.  «Օրացույց» 11.  «Էլփոստ» 12.   «Facetime»:

iOS 7-ի պաշտոնական թողարկումից երկու շաբաթ անց ներկայացվել է բջջային հարթակի երկրորդ բետա տարբերակը, որն ունի բարձր արտադրողականություն և շտկված խնդիրներ: Հիշեցնենք, որ Ամերիկյան Apple տեխնոլոգիական ընկերությունը հայտարարել էր, որ  iPhone սմարթֆոններն ու  iPad պլանշետներն արդեն այս աշնանը անցում կկատարեն նոր` iOS 7 օպերացիոն համակարգին: Ընկերությունը արմատական փոփոխություններ էր կատարել նոր օպերացիոն համակարգի ինտերֆեյսում (միջերես), ինչպես նաև մի շարք նոր գործառույթներ հավելել:  iOS 7-ը ներկայացվել էր հունիսի 10-14-ը Սան Ֆրանցիսկոյում տեղի ունեցած Worldwide Developers Conference 2013 (WWDC) համաժողովի շրջանակում: