Համացանցում հայտնվել են մատչելի iPhone-ի լուսանկարները

Ֆրանսիական Nowhereelse.fr ինտերնետային բլոգը հրապարակել է ամերիկյան Apple տեխնոլոգիական ընկերության մատչելի iPhone-ների գունավոր կաղապարների լուսանկարները: Ավելի վաղ համացանցում տեղեկություններ էին տարածվել, թե Apple-ի մատչելի սմարթֆոնները պատրաստված կլինեն կիսակարբոնատից: Համացանցում մատչելի iPhone-ի լուսանկարների առաջին հրապարակողը Tactus աղբյուրն էր, որի տվյալների համաձայն` սարքավորումը պետք է աշխատեր երկմիջուկ A5 չիպով, 5 Մգպ տեսախցիկով և թողարկվեր 5 գունային տարբերակով` սև, սպիտակ, կապույտ, կարմիր և դեղին: Աղբյուրի հաղորդմամբ` մատչելի iPhone-ի վաճառքները պետք է մեկնարկեին 2013թ. հոկտեմբերի 15-ին, և այն արժենալու էր $300: Nowhereelse.fr-ի հրապարակած լուսանկարներում պատկերված են նույնատիպ կափարիչներ: Փորձագետների կարծիքով` նման քայլով Apple-ը հնարավորություն կունենա գրավել սմարթֆոնների զարգացող շուկաները: Այս տեղեկությունները սակայն Apple-ը դեռ չի հաստատել: