Yahoo!-ն կփակի AltaVista որոնողական համակարգը

Ամերիկյան Yahoo! տեխնոլոգիական ընկերությանը պատկանող AltaVista որոնողական համակարգը կդադարեցնի իր աշխատանքները 2013թ. հուլիսի 8-ին, հաղորդում է BusinessInsider-ը` վկայակոչելով Tumblr սոցցանցի բլոգում ընկերության կատարած գրառումը: Օգտագործողներին առաջարկվում է AltaVista-ից տեղափոխվել Yahoo! Search համակարգ: AltaVista-ի փակման մասին ընկերությունը պաշտոնապես առաջին անգամ է հայտարարում: 2010թ. արդեն հաղորդվել էր ինտերնետ պորտալի փակման մասին, սակայն Yahoo!-ն պաշտոնապես չէր հաստատել տեղեկությունը: Հատկանշական է, որ AltaVista-ի հետ միասին կդադարեցվեն նաև Yahoo!-ի մյուս ծառայությունների, մասնավորապես` RSS Alert-ի, Neighbours-ի և FoxyTunes-ի աշխատանքները: AltaVista հիմնվել է 1995թ.` իր անվանումը ստանալով կալիֆոռնիական Պալո Ալտո քաղաքից, որտեղ և տեղակայված է եղել ծառայության ծրագրային մշակման մասնագետների ստորաբաժանումը: 2000-ականների սկզբին AltaVista-ն համարվում էր ամենահայտնի որոնողական համակարգը, սակայն հետագայում չկարողացավ դիմակայել ամերիկյան Google որոնողական հսկայի մրցակցությանը: 2003թ. Yahoo!-ն ձեռք է բերել AltaVista ծառայությունը: Ներկայում AltaVista-ն իր որոնողական հարցումները վերաուղղորդում է Yahoo! Search-ին: