Wi-Vi-ը կօգնի փրկարարներին և ոստիկաններին
Civilnet
Պարզվում է` Wi-Fi-ը ոչ միայն ինտերնետի տարածման հարմարավետ միջոց է, այլև լրտեսելու իդեալական սարքավորում: Wi-Fi ազդանշանի օգնությամբ հնարավոր է պարզել մարդկանց շարժը` նույնիսկ եթե նրանք պատի հետևում են: Նման համակարգ է մշակել ԱՄՆ Մասաչուսեթսի տեխնոլոգիական համալսարանի աշխատակից Դինա Կատաբին, հաղորդում է Verge-ը:
Նշված համակարգը ստացել է Wi-Vi անվանումը, որը հնարավորություն ունի հետևել և ֆիքսել միաժամանակ երեք մարդու շարժը` վերլուծելով ազդանշանի փոփոխությունները:
Հատուկ համակարգչային ծրագիրը ստատիկ խոչընդոտներից զտում է ազդանշանները, ինչպիսիք են պատերը, և գրանցում է տվյալ անձի գտնվելու վայրը:
Ծրագրային մշակման մասնագետները պնդում են, որ իրենց մշակած տեխնոլոգիան կարող են կիրառել փրկարարները` փլատակներից մարդկանց դուրս բերելու համար: Համակարգը նաև օգտակար կարող է լինել ոստիկանության համար հանցագործի` տվյալ տարածությունում գտնվելու ճշգրիտ վայրը պարզելու համար:
Փորձագետները կարծում են, որ Wi-Vi-ը հնարավոր կլինի կիրառել նաև տնային էլեկտրոնիկայի կառավարման ոլորտում, ինչպես նաև խաղային սարքավորումների վահանակներում:
Թեմա
Պատմություններ
