Civilnet
Հուլիսի 29-ի երեկոյան Սիրիայից մոտ 2 հազ. փախստական փորձել է մուտք գործել Թուրքիա, սակայն թուրքական կողմը նախազգուշական կրակ է բացել և արցունքաբեր գազ օգտագործել` չթույլատրելով նրանց մուտքը երկիր: Anadolu գործակալությունը հաղորդում է, որ նման պաշտոնական հայտարարությամբ է հանդես եկել Թուրքիայի զինված ուժերի գլխավոր շտաբը:
Վերջինս տեղեկացրել է նաև, որ մաքսանենգ ճանապարհով Թուրքիա ներխուժել ցանկացող փախստականները քարեր են նետել թուրք զինվորների ուղղությամբ: Գլխավոր շտաբի հայտարարության համաձայն` թուրքական զինուժի միջամտությունից հետո զոհեր չեն եղել:
2011թ. մարտից` սիրիական ճգնաժամի սկզբից ի վեր շուրջ 350 հազ. փախստական է հաստատվել Թուրքիայում: Ներկայում թուրք-սիրիական սահմանը խիստ անհանգիստ է. Սիրիայի հյուսիարևելյան շրջաններում կռիվներ են ընթանում մի կողմից քրդերի, մյուս կողմից` Սիրիայի նախագահ Բաշար ալ Ասադին ընդդիմադիր, արմատական իսլամիստական «Էլ Նուսրա» կազմակերպության միջև: Թուրքիային անհանգստացնում է Սիրիայի հյուսիսարելյան շրջաններում քրդերի դիրքերի ամրապնդումը, և Անկարան արդեն բանակցություններ է վարում Սիրիայի քրդական կազմակերպությունների հետ:
Պատմություններ
