Civilnet
Թուրքիան օժանդակում է Սիրիայում քուրդ բնակչության շրջանում իրականացվող կոտորածին, հայտարարել է քրդական «Խաղաղություն և ժողովրդավարություն» կուսակցության պատգամավոր Էմինե Այնան:
Ըստ Firat գործակալություն` Այնան մեղադրել է Թուրքիայի վարչապետ Ռեջեփ Թայիփ Էրդողանին ահաբեկչական «Ալ Կաիդա» ցանցի «Էլ Նուսրա» խմբավորմանն աջակցելու մեջ: Հենց այս խմբավորումն էլ սպանություններ է իրականացնում քուրդ խաղաղ բնակչության շրջանում:
Նշելով, որ քրդերի կոտորած իրականացնողներն ապաստան են գտնում Թուրքիայում, քուրդ պատգամավորը դիմել է Թուրքիայի վարչապետին և ասել. «Սրանից հետո, Էրդողան, մեզ չասես մուսուլման քուրդ եղբայրներ, դու ինքդ մուսուլման չես»:
Վերջին շաբաթվա ընթացքում Սիրիայի Թել Արան և Թել Հասըլ շրջաններում ծայրահեղ իսլամիստական խմբավորումները քրդերի շրջանում վայրագություններ են գործում: Քրդական լրատվամիջոցների հաղորդմամբ` սպանվել է 50 քաղաքացիական անձինք, 350 հոգի էլ գերի է վերցվել:
Վերոնշյալ արմատական խմբավորումները պայքարում են Սիրիայի նախագահ Բաշար ալ Ասադի դեմ և փորձում իրենց վերահսկողությունը հաստատել քրդերով բնակեցված վայրերում: Հուլիսի կեսերից սկսած` քրդերի և «Էլ Նուսրայի» միջև կատաղի մարտեր են ընթանում:
Ներկայում թե´ Իրանի, թե´ Թուրքիայի քրդերն օգնության են շտապում Սիրիայի քրդերին: Թուրքիայում քրդերը ցույցեր են կազմակերպվում` ի պաշտպանություն Սիրիայի իրենց ազգակիցների:
Պատմություններ
