Sony-ի 2 նոր ֆոտոգաջեթները հայտնվել են համացանցում
Civilnet
Էլեկտրատեխնիկա արտադրող ճապոնական Sony ընկերությունը մտադիր է բարձրացնել բջջային լուսանկարահանման որակը` մշակելով նոր օբյեկտիվ, որն ինքնուրույն կնկարահանի բարձրորակ լուսանկարներ և կփոխանցի դրանք կցված սմարթֆոնին, հաղորդում է Mashable-ը:
Վերջերս հայտնի է դարձել, որ սմարթֆոնին ամրակցվող անսովոր լուսանկարչական սարքավորումը կպարունակի ֆոտոսենսոր, լիցքավորիչ և հիշողության կուտակման SD սարք, որի վրա կկուտակվեն լուսանկարները:
Գաջեթը կցվում է սմարթֆոնին Near Field Communication (NFC) անլար կապի տեխնոլոգիայի միջոցով, որից հետո Wi-Fi-ի միջոցով վերջինիս է փոխանցում արված լուսանկարները: Նկարահանման ժամանակ որպես գաջեթի էկրան ծառայում է ամրակցված սմարթֆոնի էկրանը:
Նշված տեխնոլոգիան աշխատում է ինչպես Android, այնպես էլ iOS օպերացիոն համակարգերով աշխատող սմարթֆոնների և պլանշետների հետ: Լուսանկարներից երևում է, որ գաջեթն օգտատերերին հնարավորություն կտա իրականացնել բջջային լուսանկարահանում, որը որակաապես չի զիջի պրոֆեսիոնալ լուսանկարչական սարքերի կատարած լուսանկարներին:
Sony-ն պատրաստել է նոր գաջեթի 2 տարբերակ: Առաջինը կստանա RX100MII-ին համարժեք սենսոր և Zeiss լինզաներ: Նշենք, որ RX100MII-ը Sony ընկերության բավականին թանկարժեք և թարմացված տեսախցիկներից է: Գաջեթի երկրորդ տարբերակը կլինի ավելի փոքր չափերի` ստանալով 18 Մգպ CMOS սենսոր և 10xzoom լինզաներ:
Վերոնշյալ երկու նոր գաջեթների թողարկման ստույգ ժամանակահատվածը դեռ հայտնի չէ: Բացառված չէ, որ դրանք պաշտոնապես կցուցադրվեն սեպտեմբերին` բեռլինյան IFA ցուցահանդեսի ժամանակ:
Թեմա
Պատմություններ
