Apple-ը գնել է Matcha.tv-ն

Ամերիկյան Apple ընկերությունը շարունակում է ձեռք բերել ոչ մեծ, սակայն հեռանկարային ստարտափներ: Հերթական քայլը Matcha.tv տեսածառայության գնումն էր, որը մասնագիտացված է բջջային սարքավորումների միջոցով տեսաձայնագրություններին և հեռուստատեսային ամբողջական ալիքներին մատչում տրամադրելու մեջ, հաղորդում է BusinessInsider-ը: Աղբյուրի հաղորդմամբ՝ Apple-ը ստարտափի համար վճարել է մոտ $1-1,5 մլն: Ընկերության մամուլի քարտուղարն արդեն հասցրել է հաստատել վերոնշյալ գործարքը: Դեռ 2013թ. գարնան վերջին Matcha.tv-ն ծառայում էր որպես տարատեսակ օնլայն տեսածառայություններից, մալուխային ալիքներից և տեսանյութերի վաճառքով զբաղվող ծառայություններից բովանդակության ագրեգատոր: Ծառայությունն ուներ նաև սոցիալական գործառույթներ`  հնարավորություն տալով օգտատերերին ներկայացնել իրենց գնահատականներն ու խորհուրդները: Վերլուծաբանների կարծիքով՝ Matcha.tv-ն կլինի հաջորդ սերնդի Apple TV-ի հիմքում, սակայն այդ մասին հստակ տեղեկատվություն դեռ չկա: