LinkedIn-ում հայտնվել են համալսարանական էջեր

Գործնական կապերի որոնման և հաստատման համար նախատեսված LinkedIn սոցցանցը 2013թ օգոստոսի 20-ին սեփական հարթակի վրա նոր ծառայություն է թողարկել, որը նախատեսված է համալասարանների պաշտոնական էջերի համար, հաղորդում է TechCrunch-ը: LinkedIn-ի նոր նախագծի շրջանակում արդեն համագործակցում են ավելի քան 200 քոլեջ և համալսարան ամբողջ աշխարհում: Կրթական հաստատությունների պաշտոնական էջերը հնարավորություն կտան տեղեկացված լինել ինչպես համալսարանական, այնպես էլ վերջինիս առանձին ֆակուլտետների նորություններին, հետևել շրջանավարտների գործարար աճին, շփվել մյուս ուսանողների հետ: LinkedIn-ը մտադիր է 2013թ․ սեպտեմբերի 12-ին թողարկել նման ծառայություն դպրոցականների համար: Նոր լսարան հավաքագրելու համար LinkedIn-ը ստիպված կլինի իջեցնել սոցցանցում գրանցման համար նախատեսված տարիքային շեմը ԱՄն-ում, Կանադայում, Գերմանիայում, Իսպանիայում, Ավստրալիայում և Հարավային Կորեայում մինչև 14, Նիդեռլանդներում` 16, Չինաստանում` 18 տարեկանի: Իսկ Ռուսաստանում և աշխարհի այլ երկրներում գրանցվել կկարողանան սկսած13 տարեկանից: