Թուրքիայի մեջլիսը կքննի Սիրիայի վերաբերյալ կառավարության առաջարկը

Թուրքիայի կառավարությունը հոկտեմբերի 1-ին մեջլիս է ներկայացրել Սիրիայում մեկ տարի ժամկետով ռազմական գործողություններում ներգրավվելու կամ զորքեր ուղարկելու առաջարկը, որը թուրքական խորհրդարանում կքքնվի առաջիկա օրերին: Եթե խորհրդարանը դրական որոշում ընդունի, թուրքական զինուժը հնարավորություն կստանա անհրաժեշտության դեպքում ռազմական գործողություններ ծավալել Սիրիայում, հաղորդում է Hurriyet Daily News-ը:

2012թ. հոկտեմբերի 4-ին մեջլիսը թույլատրել էր զինուժին անդրսահմանային ռազմական գործողություններ ձեռնարկել մեկ տարի ժամկետով, որի լրանալուն պես կառավարությունը խորհրդարան է ներկայացրել ռազմական գործողություններ սկսելու մասին նոր փաստաթուղթ:

Թուրքիայի վարչապետ Ռեջեփ Թայիփ Էրդողանի ստորագրած փաստաթղթում, մասնավորապես, նշված է, որ Սիրիայի քիմիական զենքը սպառնալիք է Թուրքիայի ազգային անվտանգության համար, ավելին՝ սիրիական հակամարտության հետևանքով սպանվել է Թուրքիայի 71 քաղաքացի: