Թուրքիան թանկ կվճարի իր «ներդրման» համար. Ասադ

Թուրքիան «թանկ կվճարի» Սիրիայի նախագահի վարչակարգի դեմ պայքարող ընդդիմադիրներին աջակցելու համար, թուրքական Halk TV ընդդիմադիր հեռուստաընկերության հետ զրույցում ասել է Սիրիայի նախագահ Բաշար Ասադը, հաղորդում է Hurriyet Daily News-ը: 

«Մոտ ապագայում այդ ահաբեկիչներըի գործունեությունը կանդրադառնա Թուրքիայի վրա, և նա թանկ կվճարի իր «ներդրման» համար», - ասել է Ասադը: 

Սիրիայի նախագահին հարցրել էին թուրք-սիրիական սահմանին «Ալ Կաիդայի» հետ առնչություն ունեցող ընդդիմադիրների ներկայության մասին: 

«Անհնար է ահաբեկչությունը որպես խաղաքարտ օգտագործել և այն դնել գրպանի մեջ: Այն նման է կարիճի, որը ցանկացած պահի կարող է խայթել ձեզ», - ասել է Սիրիայի նախագահը:

Երբեմնի դաշնակիցներ Սիրիայի  և Թուրքիայի միջև հարաբերությունները վատթարացել են 2011-ի մարտից, երբ  Սիրիայում ժողովրդական ընդվզում սկսվեց: Թուրքիայի վարչապետ Ռեջեփ Թայիփ Էրդողանի կառավարությունը դարձել է սիրիացի ընդդիմադիրների աջակիցներից: 

Թուրքական կործանիչները սեպտեմբերի 16-ին ոչնչացրել են Թուրքիայի օդային սահմանը հատած սիրիական ռազմական МИ-17 ուղղաթիռը: Միջադեպից հետո Թուրքիայի արտգործնախարար Ահմեթ Դավութօղլուն ասել է, որ բանակը դիմել է «պատժիչ միջոցի», որն արդարացված է և՛ միջազգային իրավունքի, և՛ ուժի կիրառման կանոնների տեսանկյունից: Իր հերթին Թուրքիայի վարչապետ Էրդողանն ասել է, որ կառավարությունը բանակին լիազորել է սահմանային խախտումների դեպքում գործել ուժի կիրառման կանոնների (Rules of Engagement) համապատասխան: 

Այս առնչությամբ հայտարարությամբ է հանդես եկել նաև ԱՄՆ Պետդեպարտամենտը, որի խոսնակ Ջեն Պսակիի խոսքով` Թուրքիան գործել է «բացարձակապես թափանցիկ» Սիրիայի դեմ ռազմական այդ գործողության ժամանակ: