CivilnetՍիրիայի իսլամիստական խոշորագույն ընդդիմադիր ուժը դեկտեմբերի 10-ին Թուրքիայի հետ սահմանին գտնվող Բաբ ալ-Հաուա հսկիչ-անցագրային կետը գրավել է ընդդիմադիր մյուս ուժերից, որոնց թվում՝ Սիրիայի ազատ բանակին հավատարիմ ջոկատներն են, հաղորդում է Hurriyet Daily News-ը:
Բրիտանական Syrian Observatory for Human Rights իրավապաշտպան կազմակերպության հաղորդմամբ՝ Սիրիայում իսլամիստական նոր հզոր խմբավորումը, որը պայքարում է Բաշար Ասադի ռեժիմի դեմ, գրավել է Բաբ ալ-Հաուան, որը գտնվում է Սիրիայի հյուսիս-արևմուտքում:
Հսկիչ անցագրային կետի գրավումը տեղի է ունեցել այն բանից հետո, երբ օրեր առաջ Իսլամական ճակատը Սիրիայի ազատ բանակին պատկանող սահմանային կետի մոտ զենք-զինամթերքի պաշարներ էր գրավել՝ սրելով սիրիական տրոհված ընդդիմության շարքերում առկա լարվածությունը: Անցյալ շաբաթ Իսլամական ճակատը հրաժարվել է ճանաչել Սիրիայի ազատ բանակի հեղինակությունը, որը Սիրիայում քաղաքացիական պատերազմի սկզբից ի վեր ձևավորված գլխավոր ընդդիմադիր ուժն էր՝ կազմված դասալիքներից և քաղաքացիական սեկտորից:
Իսլամական ճակատը ձևավորվել է նոյեմբերին վեց ընդդիմադիր խմբավորումներից, որոնք ի հայտ են եկել Ասադի ռեժիմը տապալելու և իսլամական պետություն հաստատելու նպատակով: Դրա կազմում ներառված չէ «Ջաբհաթ ալ Նուսրա» ճակատը կամ «Իրաքի և Շամի իսլամական պետություն» խմբավորումը՝ ջիհադական երկու ընդդիմադիր խմբավորումները, որոնք կապված են «Ալ Կաիդայի» հետ:
Սիրիան 2011թ․մարտից ներքաղաքական ճգնաժամում է։ Երկրի ընդդիմությունը պահանջում է Սիրիայի նախագահ Բաշար ալ Ասադի պաշտոնաթողությունը՝ կառավարական ուժերին մեղադրելով խաղաղ բնակչության նկատմամբ զանգվածային բռնությունների իրագործման մեջ։ Պաշտոնական Դամասկոսը վստահեցնում է, որ ժողովրդավարական կարգախոսների քողի ներքո երկրում գործում են «զինված ահաբեկչական խմբավորումներ»։ Համաձայն ՄԱԿ-ի տվյալների՝ հակամարտության սկզբից ի վեր Սիրիայում զոհվել է ավելի քան 100 հազ․ մարդ, փախստական է 2,8 մլն սիրիացի, ևս 6,5 մլն սիրիացի համարվում է ներքին տեղահանված։
Պատմություններ
