Ստեփանակերտն ու Շուշին` Google Earth-ում
Civilnet
Եռաչափ մոդելավորմամբ զբաղվող «Լոկատոր» ընկերությունը եռաչափ մոդելավորել (3D) և Google Earth համակարգում ներբեռնել է Ստեփանակերտ և Շուշի քաղաքները՝ հնարավորություն ընձեռելով վիրտուալ ճանապարհորդություն իրականացել Արցախի պատմական քաղաքներով, ասված է «Լոկատոր» ընկերության տարածած հաղորդագրությունում:
‹‹Նախագիծը հնարավորություն է տալիս այցելել Արցախ ոչ միայն սփյուռքահայերին ու օտարերկրացիներին, այլև հենց մեր հայրենակիցներին, որոնք ինչ-ինչ պատճառներով դեռևս չեն եղել ԼՂՀ-ում: Բացի այդ, ներկայում վիրտուալ դաշտում մեր հարևաններն Արցախի այլ կերպար են ներկայացնում: Սա է նաև պատճառը, որ շատ կարևոր ենք համարում մեր երկրի յուրաքանչյուր հողակտորի ճիշտ և պատկերավոր ներկայացված լինելը համացանցում››,- նշում է «Լոկատոր» ընկերության կոմերցիոն տնօրեն Վլադիմիր Սոֆյանը:
Ներկայում «Գուգլ Մոլորակ» համակարգում արդեն տեղադրված են Ստեփանակերտի և Շուշիի հիմնական շենքերը, արձանները և կանաչ գոտիները։ Ցանկացած եռաչափ մոդելի վրա սեղմելով` վիրտուալ ճանապարհորդը կարող է կարդալ շենքի վերաբերյալ տեղեկատվություն և կտեսնի շենքի գտնվելու վայրի ճիշտ անվանումը` Ստեփանակերտ անվամբ քաղաքում:
Ընկերությունը նախատեսում է եռաչափ մոդելավորել և համացանցում տեղակայել նաև Արցախի մշակութային հարուստ ժառանգությունը` պատմամշակութային կոթողները, վանքերն ու եկեղեցիները, արձանները և այլն: Այս պահին «Լոկատորն» իրականացրել է Գանձասարի և Ղազանչեցոց եկեղեցիների 360 պանորամիկ լուսանկարները:
Տեղադրություն
Թեմա
Պատմություններ
