Հայկական արտադրության պլանշետը կարժենա $180

Կառավարության դեկտեմբերի 19-ի նիստում որոշում է ընդունվել  «Թեքնոլոջի ընդ սայնս դայնամիքս» ՍՊԸ-ին «ՌԱՕ Մարս» տարածքում տրամադրել շահագործողի թույլտվություն` պլանշետների հավաքման և ծրագրավորման գործունեության իրականացման համար: Ինչպես հաղորդում են կառավարության մամուլի ծառայությունից, ընկերությունը նախատեսում է համագործակցություն հաստատել պլանշետների արտադրության ամերիկյան Minno գրասենյակի հետ, որը կստանա Հայաստանի կազմակերպության թողարկած բոլոր պլանշետները և կզբաղվի դրանց իրացմամբ և առաքմամբ: Գործունեության երեք տարվա ընթացքում արտադրության ծավալը 10 հազ. պլանշետից կհասցի 50 հազ., միավորի գինը կլինի $180, ինքնարժեքը` $135: Առաջին տարում արտադրություն կներդրվի $1,35 մլն, երրորդ տարում` $6,75 մլն: Կառավարության հիմնավորման համաձայն` բացի ներդրում ներգրավելուց` ազատ տնտեսական գոտու շահագործումը հնարավորություն կտա խթանել բարձր և տեղեկատվական տեխնոլոգիաների ոլորտում ստեղծված արդյունքի արտահանումը, նպաստել տվյալ հատվածում հայկական բրենդի ճանաչմանն ու տարածմանը: Կառավարությունում դեկտեմբերի 6-ին վարչապետին կից արդյունաբերական խորհրդի նիստը սկսվել էր հայկական արտադրության առաջին պլանշետի (Armtab) և առաջին հեռախոսի (Armphone) ներկայացմամբ: