ՊԵԿ նախագահն ինքն իրեն չի ստուգում

Պետեկամուտների կոմիտեի նախագահ Գագիկ Խաչատրյանի հետ փոխկապակցված ընկերություններն այս տարի ևս կխուսափեն հարկայինի ստուգումներից։

Պետական եկամուտների կոմիտեն 2012-ից հարկ վճարողների մոտ ռիսկերի վրա հիմնված ստուգումներ է իրականացնում։ Վերջին երկու տարվա ստուգումները ցույց են տալիս, որ ՊԵԿ նախագահի հետ փոխկապակցված ընկերությունները «ռիսկային չեն»։

Պետական եկամուտների կոմիտեն (ՊԵԿ) 2012-ից հարկ վճարողների մոտ իրականացնում է բացառապես ռիսկերի վրա հիմնված ստուգումներ. հաշվի առնելով ընկերությունների կողմից ներկայացված տվյալները՝ համակարգն է որոշում ընկերության ռիսկայնության աստիճանը։ Թեև այս համակարգի ներդրումն ուղղված էր մարդկային գործոնի և կոռուպցիոն ռիսկերի նվազեցմանը, ՊԵԿ նախագահ Գագիկ Խաչատրյանի հետ փոխկապակցված ընկերությունները, այդուհանդերձ, դուրս են մնացել հարկայինի ուշադրությունից։

Տնտեսվարողների մոտ հարկային ստուգումների, ուսումնասիրությունների տարեկան պլանը հաստատում է ՊԵԿ նախագահը։

ՊԵԿ-ի կայքում տեղադրված տեղեկության համաձայն՝ 2013թ. ընթացքում իրականացվել է մոտ 9 հազ. ստուգում, 40 վերստուգում և 9,6 հազ. ուսումնասիրություն։ 2012թ. համեմատ ստուգումների թիվը կրճատվել է 27,5%-ով, վերստուգումներինը՝ 2,3 անգամ, ուսումնասիրություններինը՝ 27%-ով։

Թեև անցած տարի հարկային մարմինների աշխատակիցները զգալի աշխատանք են կատարել, սակայն որևէ գործողություն չեն իրականացրել, օրինակ՝ կոնֆետներ և հրուշակեղեն արտադրող ռուսական և ուկրաինական խոշոր ընկերությունների արտադրանքի ներկրող «Մեգաֆուդ» ընկերությունում, «Միցուբիշիի» ներկայացուցիչ «Մեգա Մոթորսում», թանկարժեք ժամացույցների և զարդերի «Խրոնոգրաֆ» խանութ-սրահում, սպորտային հագուստի և իրերի «Մեգա Սպորտ» խանություն, ֆիքսված հեռախոսակապ, ինտերնետ հասանելիության ծառայությունների մատուցող «Յուքոմ» ընկերությունում։

Այս ընկերություններում ուսումնասիրություններ և ստուգումներ չանցկացնելը կարող էր օբյեկտիվ պատճառներով պայմանավորված լինել, օրինակ՝ գործունեության այս ոլորտներում առհասարակ ստուգումներ չեն իրականացվում։ Սակայն նախորդ տարվա ընթացքում անցկացված ստուգումների և ուսումնասիրությունների վերաբերյալ ՊԵԿ-ի հաշվետվությունից երևում է, որ ՊԵԿ նախագահի հետ փոխկապակցված ընկերությունների մրցակիցների մոտ անցկացվել են թե՛ ստուգումներ, թե՛ ուսումնասիրություններ։ Օրինակ՝ ՊԵԿ-ի աշխատակիցները շրջանցել են «Յուքոմը», բայց «Օրանժ Արմենիայում» իրականացվել է ուսումնասիրություն, «ԱրմենՏելում»՝ ստուգումներ, «ՋիԷնՍի Ալֆա» (ապրանքանիշը՝ «Ռոստելեկոմ»)ընկերությունում՝ վերստուգում։ «Մեգաֆուդի» հիմնական մրցակից «Սովռանո» և «Գրանդ քենդի» ընկերություններում անցկացվել են թե՛ ստուգումներ, թե՛ ուսումնասիրություններ։

Իհարկե, մրցակից ընկերություններում ստուգումների արդյունքում հնարավոր է հայտնաբերվեն «խախտումներ», նշանակվեն տուգանքներ, սակայն շատ ավելի է մտահոգիչ է, որ այս ստուգումների և ուսումնասիրությունների ժամանակ հարկային աշխատակիցներին հասանելի են դառնում այնպիսի տեղեկություններ, որոնք պարունակում են կոմերցիոն գաղտնիք և դրանք մյուս մրցակցին՝ ՊԵԿ նախագահին հասանելի դառնալու դեպքում վերջինիս կապահովվեն լուրջ մրցակցային առավելություն։

Ի դեպ, ՊԵԿ նախագահի հետ փոխկապակցված ընկերություններում այս տարի ևս ոչ մի ստուգում, ուսումնասիրություն չի իրականացվի։ Համենայն դեպս, հարկային մարմնի կողմից իրականացվող ստուգումների ծրագրում այդ ընկերությունները ներառված չեն։

Լուսանկարը` Ֆոտոլուրի