Աշխարհում նշվում է Անվտանգ ինտերնետի օրը
Civilnet
Աշխարհում նշվում է Անվտանգ ինտերնետի օրը (Safer Internet Day), որը 2004թ. սահմանել է Եվրահանձնաժողովը: Ավանդաբար այն նշվում է փետրվարի երկրորդ շաբաթվա երկրորդ օրը: Նշվող օրվա նպատակն է բոլոր շահագրգիռ պետական, հասարակական և մասնավոր ընկերությունների ջանքերը միավորել ինտերնետ-տեխնոլոգիաների անվտանգ կիրառման մասին գիտելիքների մակարդակի բարձրացման շուրջ:
Անվտանգ ինտերնետի օրվա գլխավոր համակարգողը Insafe ոչ առևտրային կազմակերպությունն է, որը բաղկացած է Եվրահանձնաժողովի մասնակցությամբ ստեղծված ազգային կազմակերպություններից: Insafe-ի առաքելությունն է աջակցել քաղաքացիներին` ինտերնետի անվտանգ և արդյունավետ կիրառման գործում:
Անվտանգ ինտերնետի օրը նշող բոլոր երկրներում կազմակերպվում են կլոր սեղաններ, համաժողովներ ու ֆորումներ, որոնց ընթացքում քննարկվում են համացանցում անվտանգության հիմնական խնդիրներն ու տարբեր վտանգների մասին օգտատերերին տեղեկացնելու հարցը: Այս տարի միջոցառումներ կանցկացվեն աշխարհի 110 երկրում, իսկ ԱՄՆ-ում Անվտանգ ինտերնետի օրը կնշվի առաջին անգամ:
Թեմա
Պատմություններ
