Ստամբուլում ոստիկանությունը ցրել է ինտերնետի վերահսկողության դեմ բողոքի ակցիան

Photo: http://www.infowars.com

Ստամբուլում փետրվարի 22-ին ոստիկանությունը արցունքաբեր գազ և ջրցան մեքենաներ է կիրառել մոտ 3 հազ. ցուցարարների դեմ, որոնք փողոց էին դուրս եկել՝ բողոքելու ինտերնետային սահմանափակումներ նախատեսող օրինագծի դեմ, հաղորդում է AFP-ն:

Բողոքի ակցիայի մասնակիցները պահանջել են վարչապետ Ռեջեփ Թայիփ Էրդողանի հրաժարականը:

Ցուցարարները փորձել են մտնել քաղաքի Թաքսիմ կենտրոնական հրապարակ, սակայն ոստիկանությունը շրջափակել է այն և արգելել առաջ շարժվել: Ի պատասխան՝ ցուցարարները պայթուցիկներ են նետել ոստիկանների ուղղությամբ: Բախման հետևանքով մի շարք քաղաքացիներ են ձերբակալվել:

Թուրքիայի Ազգային մեծ ժողովը փետրվարի 6-ին ընդունել է ինտերնետի օգտագործումը սահմանափակելու վերաբերյալ օրինագիծ : Օինագիծը ենթադրում է, որ համացանցից օգտվողները պետք է ստանան հատուկ թույլտվություն, արգելվելու է մուտք գործել որոշ կայքեր: Թուրքիայում գործում է «Մի դիպչիր ինտերնետին» շարժումը, որը կառավարության դեմ ընդվզումների հիմնական կազմակերպիչն է: Շարժման ֆեյսբուքյան էջն ունի 600 հազար աջակից:

Թեև կառավարությունը վստահեցնում է, որ սահմանափակումները անվտանգության նկատառումներով են իրականացվում, Թուրքիայում համոզված են, որ պետությունը փորձում է այս ոլորտի վրա ևս վերահսկողություն հաստատել: