Հաշվեհամար` քեսապահայերին օգնելու համար

«Հայաստան» համահայկական հիմնադրամը քեսապահայերին աջակցելու նպատակով հատուկ հաշվեհամար է բացել, ասված է հիմնադրամի տարածած հաղորդագրությունում: 

Մարտի 21-ի վաղ առավոտյան սիրիացի ապստամբների զինված խմբավորումները Թուրքիայի կողմից անցել էին սիրիական սահմանը և հարձակվել Քեսապի հայաբնակ շրջանի ու շրջակա գյուղերի վրա: Մարտի 22-ի երեկոյան Քեսապի գյուղերի բնակչությունն ամբողջությամբ արդեն տարհանվել էր Լաթաքիա:

Հիմնադրամի հրապարակած կոչում ասված է. «Սիրելի հայրենակիցներ, քույրեր և եղբայրներ, վերջին օրերին մենք վկա ենք Քեսապի ողբերգական իրադարձությունների, դեպքերի, որոնք վերարթնացնում են մեր հիշողության մեջ հայ ժողովրդի պատմության ամենատխուր էջերը: Արդեն ակնհայտ է, որ գործ ունենք հումանիտար աղետի հետ: 

Այս փորձության պահին մենք կոչ ենք անում հայրենաբնակ և սփյուռքահայ բոլոր անհատներին և կազմակերպություններին բարոյական և մանավանդ նյութական աջակցությամբ սատարել ծանր օրեր ապրող քեսաբահայությանը: Բացվել է հատուկ հաշվեհամար այդ նպատակով: Մենք կոչ ենք անում ձեր նվիրատվություններն ուղղել այդ հաշվեհամարին: Մեր պարտքն է գոնե փոքր չափով մեղմել մեր հայրենակիցների ցավն ու կորուստները: 

Ողբերգությունը, որը դեռ շարունակվում է, միայն Քեսապի հայերինը չէ: Հարվածն ուղղված է ողջ հայությանը: Սա բոլորիս հարցն է և բոլորիս մարտահրավերը»: 

Հիմնադրամը տեղեկացնում է, որ նվիրատվությունները կարող են ուղղվել «Արդշինինվեստբանկում» բացված հետևյալ հաշվեհամարներին` 

247010003090 (ՀՀ դրամ) 

247010003090/0001 (ԱՄՆ դոլար) 

SWIFT: ASHBAM22