Հերթական 80 մլն դրամը` ՏՏ ոլորտին

Հայաստանում գերակա հռչակված տեղեկատվական տեխնոլոգիաների ոլորտի խթանմանն այս տարի ևս բյուջեից կհատկացվի 80 մլն դրամ: Գործադիրն ապրիլի 3-ի նիստում հաստատել է տեղեկատվական տեխնոլոգիաների ոլորտի խթանման ծառայությունների 2014թ. ծրագիրը: Ինչպես հաղորդում են կառավարության մամուլի ծառայությունից, այդ միջոցների հաշվին կանցկացվեն արդեն ավանդական  դարձած «Դիջիթեք» ցուցահանդեսը, «Դիջիթեք բիզնես ֆորում 2014», «Արմթեք 2014» համաժողովները և այլն: Գործադիրում նշում են, որ այս միջոցառումները միտված են ցուցադրել հայկական տեղեկատվական տեխնոլոգիաների ոլորտի նվաճումները, կառավարության, մասնավոր հատվածի, գիտական և կրթական հաստատությունների և դոնոր կազմակերպությունների համագործակցության, միասնության և համատեղ ջանքերի արդյունքները: Կառավարությունը դեռ 2000թ. հեռահաղորդակցության և տեղեկատվական տեխնոլոգիաների ոլորտը հռչակել է գերակա. ոլորտի աջակցությունն այսօր էլ սահմանափակվում է յուրաքանչյուր տարի պետբյուջեից միջոցներ հատկացնելով և զարգացման հերթական տարեկան ծրագիրը հաստատելով։ Արդեն հինգերորդ տարին ՏՏ ոլորտին պետբյուջեից հատկացվում է 80 մլն դրամ, որի մի մասն ուղղվում է համաժողովների, ֆորումների և ցուցահանդեսների կազմակերպմանը։