Civilnet
Ֆրանսիայի Ազգային ժողովի պատգամավոր, Եվրոպայի խորհրդի խորհրդարանական վեհաժողովի փոխնախագահ, վեհաժողվում Ֆրանսիայի պատվիրակության ղեկավար Ռենե Ռուքեն Քեսապի խնդրով դիմել է Ֆրանսիայի արտաքին գործերի և միջազգային զարգացման նախարար Լորան Ֆաբիուսին: Պարոն Ռուքեի նամակը թարգմանաբար և կրճատումներով ներկայացված է ստորև:
«Պարոն արտաքին գործերի և միջազգային զարգացման նախարար
Մարտի 21-ին սահմանային Քեսապ գյուղի գրավումը սիրիացի զինյալների կողմից ոչ միայն քաղաքացիական պատերազմի հիմնական պահերից է, որն արդեն երեք տարի է՝ խժռում է Սիրիան, այլև մարդկային աղետի մեկնարկային ազդանաշանի փաստ. […]
Դժբախտաբար ռազմական այս գործողությունը պարզապես սիրիացի զինյալների և ապստամբների կողմից չի իրականացվել, այլ ջիհադական խմբավորումների՝ հատկապես «Ջաբհաթ ան Նուսրա» խմբավորման կողմից, որը Լևանտում «Ալ Կաիդայի» ճյուղերից է և հիմնականում կազմված է թուրքմեններից: [...]
Ջիհադականների՝ շրջանի հայ բնակչության դեմ էթնիկ զտումների ցանկությունը իրական է: [...] Այս գործողությունում Թուրքիայի կառավարության և բանակի լռելյայն մասնակցությունը անհերքելի է՝ հաշվի առնելով, որ «Ջաբհաթ ան Նուսրա»-ի մարդիկ Քեսապի վրա հարձակումից օրեր առաջ հաստատավել էին Թուրքիայում:
Սիրիայում բոլոր ձևերով հայկական ներկայության վերացման ցանկությունը իրական է թվում՝ հաշվի առնելով, որ վերջերս Հալեպում ավերվեց Զվարթնոց եկեղեցին, իսկ Քեսապի գրեթե ամբողջ անշարժ գույքը՝ տները և բազմաթիվ եկեղեցիները թալանվել են ջիհադականների կողմից մարտի 22-ի հարձակման ժամանակ:
Մեր երկիրը միշտ փորձել է պաշտպանել և պահպանել քրիստոնյաների ներկայությունը Արևելքում․ ուստի մենք պետք է միջամտենք՝ պաշտպանելու քաղաքացիական անձանց, որոնք զգալիորեն տուժում են այս՝ որքան անսպասելի, նույնքան դաժան հարձակման հետևանքներից, որը գլխավորել են «Ջաբհաթ ան Նուսրա»-ի ջիհադականները։ Փաստացի Սիրիայի բոլոր 15 հազ․ հայերը՝ 5 հազ-ը՝ Քեսապից, որոնք ապաստանել են Լաթաքիայում, և 10 հազ-ը՝ Հալեպից, որոնք ենթարկվում են կանոնավոր ռմբակոծման, ներկայում չունեն որևէ ռեսուրս և պետք է ապավինեն օտարերկրյա մարդասիրական օգնությանը, որպեսզի ապրեն։ [...]
Պարոն արտաքին գործերի և միջազգային զարգացման նախարար, ամիսներ շարունակ մենք փորձել ենք գտնել լուծում, որը տևական խաղաղություն կհաստատի Սիրիայում և որը իշխանությունից կհեռացնի Բաշար Ասադին՝ միաժամանակ երաշխավորելով հարգանք ամբողջականության և Սիրիայի տարբեր համայքների շահերի պաշտպանության նկատմամբ։
Մեր երկիրն այսուհետ պետք է ավելի շատ ներգրավված լինի միջազգային խոշոր ֆինանսավորում տրամադրելու հարցում, որը պետք է կոչված լինի օգնելու Սիրիայի հայ համայնքին՝ պահպանելու այս տարածաշրջանում հայկական դարավոր ներկայությունը»։
Մարտի 21-ին զինված խմբավորումները Թուրքիայի կողմից անցել էին սիրիական սահմանը և հարձակվել Քեսապի և հարակից հայաբնակ գյուղերի վրա: Մարտի 22-ից Քեսապի գյուղերի բնակչությունն ամբողջությամբ տարհանվել է և ապաստանել է Լաթաքիա հայկական եկեղեցում:
Պատմություններ
