Civilnet
Ապրիլի 7-ի առավոտյան Թուրքիայի հայկական Վաքըֆ գյուղում ապաստանած 21 քեսապցի հայերին միացել է ևս մեկը՝ Լուտէր Թրթրեանը, որն 80-ն անց է և առողջական լավ վիճակում է: Այս մասին ՍիվիլՆեթին հաղորդում են Վաքըֆ գյուղի հայ համայնքի ներկայացուցիչ Ջեմ Չափարը և Անթաքիայում մարդասիրական օժանդակությամբ զբաղվող Սաղաթել Բասիլը:
Նույն աղբյուրների համաձայն` կա նաև մեկ անձ, որ բուժում է ստանում Քեսապում` հակակառավարական զինյալ խմբերի մոտ, և շուտով ուղարկվելու է Վաքըֆ գյուղ: Ըստ Չափարի` նրա անունն է Մուսա (Մովսես) Սահակեան: Այսպիսով` անհայտ կորածների ցանկի անձանց թիվը իննից հասել է յոթի:
Մարտի 21-ին Թուրքիայի սահմանը հատած հակակառավարական զինյալ խմբավորումների` Քեսապ ներխուժումից հետո ավելի քան 600 հայ ընտանիք նույն օրը թողել է տները և ապաստանել Քեսապից 65 կմ հեռու գտնվող Լաթաքիա քաղաքում: Քեսապում մնացել էր մի քանի տասնյակ մարդ: Առաջին շաբաթվա ընթացքում նրանց մասին լուր չկար, սակայն անցած շաբաթ 21 հոգի, մեծամասնությամբ ծերեր, հայտնվեցին Թուրքիայի սահմանում, ապա տեղափոխվեցին Թուրքիայի վերջին հայկական՝ Մուսալեռան Վաքըֆ գյուղում:
Նրանց հետ հանդիպել է Սաղաթել Պասիլը, որը ՍիվիլՆեթին պատմել է ծերերի ճանապարհի մասին: Նրանց պատմածների համաձայն՝ իրենց տներից հանել ու հավաքել են Քեսապի կենտրոնի Կաթողիկե վանքում, որպեսզի աղոթեն, ապա նրանց աղոթքը նկարահանելուց հետո առգրավել են անձնական փաստաթղթերը, լցրել մեքենաները և ուղարկել թուրքական սահման: Նրանցից շատերի անձնագրերը չեն վերադարձվել:
Ավելի շատ տեղեկությունների համար այցելեք ՍիվիլՆեթի Understanding Kesab կամ Սիրիա բաժինները:
Պատմություններ
